Friday, June 02, 2006

受氣

今天一大早便爬起床,
在洗手間內擾攘了將近半小時,
set好了一個''智能頭''
↑拍智能身份證用的頭,作用與oral頭相近
雖然效果不甚理想,
但總比亂糟糟的好,
畢竟智能I.D.要用一輩子(運氣好的話)

冒著雨匆匆的趕至火炭會合早已約好同學
眼見他們倆都穿著校服,慚愧的念頭油然而生
籍辦護照及身份證為由請了一天假,
一個typical小事化大的例子

正題
在counter前拿籌,紅色Y-3阿伯一見我還未足18歲
便向我問東問西:「你未夠18歲,要帶埋父母結婚證明書架喎」
心中立時打了一個突兀,結婚證明,唔係呀嘛,要既咩??
慌張的我下意識地還了一句:「下,關事既咩?無唔整得架?」
回得極快,答案亦令人錯愕:「梗係啦。你係咪要籌架,唔係就讓下個啦」
態度未免太過惡劣了吧
老虎嗌都拎左先啦,點都唔蝕俾你
17號籌,唔信邪,再去問多一次看似高級點的職員
制服男:「你番去拎齊晒證件再番過黎啦,張籌12:30前仲有效」
無奈,只有屈服
因暴雨關係,比預期慢了整整30分鐘才趕回家
也罷,只要辦得到,辛苦一點也值得
順便也都邀請了leona,免得再生技折
又再趕回去
又是那god damn扮young的紅色Y-3阿伯
「拎到番黎喇?」
唔係我趕番黎托呀?
「好啦,有無帶父母身份證副本?」
我頂,你唔一早講埋,玩野呀些憤友?
「咁整唔到架喎,拿,你唔信可以問下counter既職員」

counter:「係架,一早講好架啦,你唔係聽唔到呀?」
你班冗員就聽唔到,我肯定你兩件二打六無講過啦
counter:「一係你交左表格先,今日之內再補番副本都得」
終於都肯講d人話喇,好!
斃!霎時醒起,原來申請書漏左係班房,頂!
我份表格漏左係學校,而家番去拎番得唔得?
counter:「十二點半前一定要拎到黎,唔得就下次先啦」
哦,12點半放飯呀
屹起條尾就知你諗緊咩啦
番工等放飯,仲唔係標準到暈既冗員?

恰好碰上天文台掛上紅雨,(不知是福是禍,難得一天請假,居然紅雨...)
便想要同學替我送過來
又不知是甚麼新政策,他們都俾軟禁在班房內,
等校工送飯上班房,吃完,才可離去
反正都係要番屋企,唔爭在啦,
中飯也不吃,頭也不回,撇下leona趕回學校
更亭前
看更:「咩人?番黎咩事?」
我今日請左假整護照,但係漏左份form係班房,
想番上去拎番
看更:「Form5?定係其他Form?」
Form6
看更:「唔俾你入喎,學校規定平日番黎要著校服家嘛」
我知,但係我今日請左假,無諗過番黎
只不過因為漏左份form至番一番黎
看更:「都係唔得,我唔俾得你入」
吹漲
一路淋著雨,一路乾著急
同學又出不來,怎辦才好?
此時,有名穿著便服的男子,和看更談了數句,
甚至連身份都沒有核實,便讓他施施然的步入學校
咩校規咁頂癮呀?只要話自己係Form5就點著都入得
咁我話我係校董個仔你係咪要即刻幫我lam鞋呀?
仆心仆命趕番黎拎番份Form你咁都攔臭我?
你想點呀
幸好,國lim路過,他也很樂意當一個送信人
可惜,當時已經12:40分
冗員們已歎緊飯
shit

其實最大的問題出在我自己身上,這點我還是了解的
一早看清楚規例便不會有這麼多的問題
可是我最不滿是還是他們(扮young中坑,等放飯counter及板板六十四看更)
那種半死不活的工作態度
要提醒人又不詳盡一點
要扮好人又不全面一點
要攔臭人又不盡責一點
因為生活太枯燥,想調劑一下嗎?
喂唔好搵我黎搞好喎,我無必要咁樣俾你玩
雖然年青人受點冤氣是少不免亦無傷大雅的事
只是,我覺得這點冤氣,
實在是太難下嚥了!

........................
經一事,長一智
當今次個level難升d啦!

不過我真的很想大聲吼出來
''我好火!!!!''